Undirskriftalisti

Responsive image

Afnemum kröfu um tveggja ára starfsreynslu úr rammasamningi við talmeinafræðinga

Hátt í þúsund börn eru á þjónustu talmeinafræðinga. Á sama tíma er í rammasamningi Sjúkratrygginga Íslands við talmeinafræðinga ákvæði um að talmeinafræðingar þurfi að hafa starfað í tvö ár eftir útskrift til þess að skjólstæðingar þeirra fái niðurgreidda þjónustu. Til að stytta biðlista og koma í veg fyrir tvöfalt kerfi, gerum við þá sanngjörnu kröfu að þetta ákvæði verði fjarlægt úr rammasamningnum. Vegna íþyngjandi tveggja ára starfsreynsluákvæðis í rammasamningi talmeinafræðinga við Sjúkratryggingar Íslands (SÍ) hafa biðlistar í talþjálfun lengst fram úr hófi en að jafnaði er um að ræða tveggja ára bið í talþjálfun fyrir börn um allt land, stundum meira. Vegna þessa er tvöfalt heilbrigðiskerfi orðið staðreynd þar sem foreldrar greiða talmeinaþjónustu fullu verði án aðkomu SÍ, þrátt fyrir að barn þeirra sé sjúkratryggt að fullu samkvæmt lögum. Talmeinafræðingar eru m.a. starfandi innan skólakerfisins. Þeir eru þá starfsmenn sveitarfélaga og sjá um greiningar á tal- og málmeinum og sinna þjálfun þeirra barna sem teljast með væga röskun í tali eða máli. Talmeinafræðingar eru jafnframt sjálfstætt starfandi, á samningi við SÍ, og vinna þá með börnum sem þurfa á viðameiri þjálfun eða inngripi að halda vegna tal- og málþroskavanda. Nú er svo komið að útskrifaðir talmeinafræðingar sem lokið hafa sínu starfsreynslutímabili, auk þess að hafa starfsleyfi frá Embætti landlæknis, fá ekki samning við SÍ og geta því ekki unnið á þeim ógnarlöngu biðlistum sem til staðar eru. Börnin sem þurfa nauðsynlega á aðstoð þeirra að halda bíða. Ráðherrar vita af stöðunni en aðhafast eingöngu í orði en ekki á borði. Nú er mál að linni. Við skorum á ráðherra fjármála, heilbrigðis- og barnamála að taka höndum saman og finna lausn í þessum viðkvæma og mikilvæga máli. NÚNA.

29.11.2021 - 20.12.2021

Aldursbil 0 - 120

Brynja Björg Halldórsdóttir

Skráningar á lista



Það hafa skráð sig á listann.
Það hefur enginn skráð sig á listann ennþá.
Það hefur einn skráð sig á listann.